Ontay & Marogong.Net - MARANAO LOVE LETTER

MARANAO LOVE LETTER
Exclusive Article

Poon sa Mangoda

Alamataya ranon a pizoratana gagaw a pikhaat a rangkono a paka pephanogoden ke tawangko diko bethon. a saya pephakaganat ko ladangko riniwada, na inao ala kirim na obaka phakadanon ko manga bantoga a tao na zizino zinowangka o da a rampana a dar na salamangka rinao na gokabo zandoa ayan sa mabaloya tadman na mawita panginogon a makalimogaw sa dar. N o amay ka masokatso alongan lomalangkap a senang mangongorangka ko katasangko boklod a gopen ngganat ko palao a pezalindao i salega rangkaniyan ko kapenggiginawai na oman midar mipangkat na mapasa panggao sa walo na masapidao sa pat na somigay mangangarig sa orogana kiblat na mendod na zando ayanko balibeto iranon na gonian panogoda so lad laino kaparan na mama mindo malondong a artawang gonawan na lagido gopn kidar apemangidansalian na oda kalalansaye a pagalongan so laod na morog na thaman taman i salgo sindaw niyan na asar bo ka minidar i tanda aken ko lalag na ipananayan aken sa aoga-gaog a ganding a sengkoana ronokan a sariato lalakho ka oba ako arangen sa phamanen dezen a dapat a orgis sa ginawa a bimban sa taginepen ka riwara bimban sa dar ka daaken mipagenong sa alongan tanan aya ka oman raken lomimbo so kapenggiginawai na o aya romba aken na baaken midederang a ginawa ko a rasy ko olona man so gawn na oman raken lomimbo so iroy ago so tadem na manako den a ponay a somengko kagagawan sa daden a borodanon na dikoden kapantonan na pekhasaodan aken sa dalaana maminar ka bakopen da borodi a aloyo so damo-aw na daa biyorodanon na adaw rintanga pikir a tangkeda lolotaken namawatan sa ginawa i baakongka lembae sa oragis ago dapat a tadman sa tonganay na inao na maregen na aya ola-olako na marinao di marinao raraprap ko wig na diko maphaka anged

i ba adempen a ragat a salakaw ko kalodan ka diko maphaka anged ka soden so ranonaken sa romba a ladaneka a oba sagona madiwang i kapenggignawai ka rongko pakakelasa i iniliboteng sa darem ka toba ako maribon na asara pimbitakan a lomalan sa tadman na oso kakhondalia na malo ko kondaraan ka minikarangaken den so inisomaringeno wig a dita kaphanarigan ka lalayon di tanggongen na oso lad o ladangko na diden simbaran sa tig ka osa imnatowaya na pezeleg sa madiris ko lapal o bilanga tawo na pegondaya ko alam so botoon ko otowan ka pelangkap ko maklok so kakasi o alongan ka pezinta somalindaw ko belangan ko dangaday na osa imantow aya na tiyalingoma rasay so da malayam sa dindang na inadil so bolawan sa ropa katonganaya . aya katanodanon na na diman mkambinentay sa ba makapayandeg ka so simalawn o ganding na mindaog sa kakasi a ipekhasirang o tawo ko mawatan go marani na pezengko ko pagiridan sa panogodana bantog na mitho manto kargan i ola-ola kargan.

Na lengenan ta sayaden i giyagaw sa kanggaring ka makabolotha ribon na ditaden makatimbang ko mga bantoga a tawo. Inao ala sorat na o amay ka marinaw na balingangka sa rinaw na sowi ka sa rangkono ka bataden maka alang sa ko tawo a makadadaya. Tamat.

Pikaatan a ranon I Mangoda sa Maganding

sa minirigi darimbang

Sumbag a Raga

Pzambesamber pman so rininto magayoong a inodara magaog a makapokaw sa pikir ka oman raken lomimbo na dikoden kapantunan na kasaudangko sa lo ka awga pindo iyan a kiyarendana raken ka aden kon a salakaw a maka biraye sa dar, na inao ala kirim na obaka phaka danon ko tawa malambata tawn na oba kidar mipangkat na bolayokangka rinaw na lengi angka a gagaw na dikapman prondan ka kadawayan ka a tao. Amay ka minayongka ko mawatana salinding a aya kadederangan o tantowa lolotaken na aloyo angka pindo, na perinarinawingka na gongkawn panothola a soden so kyatangked a mithinampiri so wig sa salalaw a legawan na mana koden a tikaw a rinadongana torog, ka kagiya si maregen a romibon ka romibon na obabo piragatan a kabsaran so insan na go bo rangkono mawog sa makarampana sa dar, na kiyabagowam pman so kapenggiginawai a dita masangkaya dar na daandorangan tawon.

Ino saken maregen a minsan orimpay so wig ka ana manayo sa dar, na katigangkoron a pakapepenogoden sa ginawnagka ranongko a thalenda ka inalang a biyolawangko sa dar a dako paka oba ko alongan so maoray, ka baaken mambo ngaran a karenda renda aken ko kayo mering bolawan na birai sa mawatan na lengengka inantara a maregen sa ginawa ka mathakho patogina a kandadilagaken ko kayo pata romaging na di ta kaphagimanan ka bimban sa sakaingud na inao bolawangko na odaka zarog maganatang sa romangkono so pandang na manganon so kanggaring na obako minikopor a sekabo i kawgan a kataman sa ranon a kaposan sa rangkono na kagiya sa imanto na sansara imantawn ka inalang ako niyan sa inikasawanga dar.

Inao ala kirim na o amay ka marinaw na goka makambalingan na zanaangka ko gadong so panyolam masaleg a pimbogabonga dar a daraken pethorogen a kinidakatengkoron ko ingaran di matembo na oba kelas so sigay na mimbalingan ki ladan ka apiya di manayo ka ba kilasan gagaw na pagadimaten aken a tadman ko kanggaring ka dibo tatap sa pikir na matag pephaka alang ko kanayo initangkap a ipzorota iman.

Marendan so inzana sa ginawangka a kirim na paladangkawn layok so toladang kamanisan ka bankari di katawi a pito barang so borok a inikhanayoon ka ba aya koron sabot rendanen ta niyambo sa daa kasidan tawon. Na Lengenan ta sayaden e ranon gagaw sa lolot ka bataden tatangkeden a tawa malamba tawon...

Pisoratan a gagao sa madalundug a ingud i

Labi Olan Payongan

We would like to thank

Maam Shynab Cabugatan of

Bobonga Marantao National High School

For this Beautiful Article

Sorat sa da mitangkap

Alamat a inantang a kinowa sa marinao a poon sa maliwanag a paka puphanogodun sa madalundug a ingud a aya kalalaminan ko tawan ko diko buton ka inapiran bolawan sa madaramba kalinan a ingud I da matumbo, na inao ala sorat na amay ka minayon ka sa makayang a laminan na o izai I ka iran o andakaon gaganat na puphanotolang kaon a sii ka gomaganat ki sarimbar a di tatap a lalayon da sa piker a liniwat sa ginawa,

Na panotolang kaompun a inao na marugun na omangko mapamikir so rambayong da matatap a gadong da malalayon na dikodun kapantonan na pangasasaodan dun sa marinambayong a lo, na aya kisino koron na igira nayon ako ko salinding a dimayon a kormatan sa lilang a puphamaka kulasan ko kadiat da matanto a mialang-gay a ranon, na gowakodun rurunda ko rongan-rongan o tapar na gowakodun sambura o inodar a magaog a sii pupha ka ganat sa makayang a laminan a liaminan ki olan a oonotan a ranon a rurunganun a gagao na manakodun a rantang a kanonanonawang ko a kapuki laod akun, na miaka onotompun a apay so lilimbanan a liliwatun ko sa dar na go amay katadumi na gomagut dun si rarub,

Na kagiya da matoman e piakang-garing ta ka da malalayon sonor ka sabapampun ki milombay sa darka na batadun pagayoni a oba ako pulombai sa makoranda a datu na goka pundaridai sa kamanisan a olan na sorambalai-yata ka ron ta paka raira I piakang-garing ta a da malalayon sonor ka poon sa ladanuka,

Na pamuliin taobat a initariris inibumbur a miarorombo taman, ka oda ako makangun sa ginawang ka marugun na ayapun puphakangun I gopun plombaya, na lungunan ko sayadun sa rambayong modas ako sa romaba a ladan nuka,

Pisoratan a gagao I Kanakan a Mazandag

Sa Guindolongan Marogong

Poon sa Raga odi na Mangoda

Izanai a ranon a dii mulimbo-limbo sa awil awil a dar a daa ndorangan koron, na talibata ka ranon na riwada ka karundan ka matao kapun mayao sa matatanao I piker na panday kapun ingangan sa garing a kasansara, taliba kapun ranon sa daa ndorangan koron ka diko ayi katawan ka igabi ko ranon na ipita ko so gagao na kalambaan taonpun sa mipanioto taon, na omapangni akun na onot kadun sa sanbur na goka pulimbo-limbo ka ilaladoanian a ginawa ko a rasay ko mawatan a salinding a kalolombokan akun so kaotantang sa boko a dadun a matao ron a rowar sa ginawako, na apay oda a rido na go amay limbo sa dar a tarokonan a gagao na onotan a rangkono na go akun katadumi so diko di kasonori ko boklod sa ngganatan a palao sa pirikodan na dikodun kapantonan a romba a ladan akun na kasaodan akundun sa dadalaan maminar.

Ka aya ridoon sa dar a kumbo akodun lombay na daakodun mabintad na goko ai masarog a kiabintad ko ayi, ino ayi marugun a kiyaribon ko ayi ka madakul so karibon na daon a kiaribon ko ai, suka puman ladangko a matotongkop a rasay na sabar ka ginawako ka makabolog a koris na a minitanda sa palad na dika matag maribon oding ka kapanagadi, na suka puman marugun na o ayangka kunala I pira soson a ranon I dii mulimbo-limbo na isaon aya ranon a osoba ka sa raya na lomadas ako mambo na o phapatianod ka na lomilod ako mambo na opagalang-alang ka na maginantara ako na opanakirid ka sii ako sa kilid a dadambai a bagul ka anuka kabantayi I taman a ranon akun sa gimawangka inundao ka baso pipikirangka a kasombakan akopun o awlan ago barat na diko suka ribonun a ini pagayon a dar,

Ati bangka di sabot a bakobo na kalabun a rumba o ladan ka ko kinindolonun koron ka sobo so saromantang I dako kapanagadi ka oso kapurundagan na kia sarigidan ko, na inao na simoaw na sukaman so pisigi a ini pulundag-lundag o niyawa totongkopun a ini sisinungkoan o napas makakaranda a lalayon sa tarintang a tatap sa taginupun a da ganapun sa torog si inalang a darimbang, na ribonun ko sayadun I kararanona koron,

Pikaatan a ranon I Taginupun sa Ranao

A lalayon sa Tarintang

Ikatlo ago ikapat a Sorat na poon sa Pamikiran ago pimbaalan e

Datu Acmad (Ontay) Macagaan Abdulmadid

Sumbag ko Surat a Pimbaalan e

Shynab Cabugata, Bobonga Marantao

National High School