Ontay & Marogong.Net - RADIA INDARAPATRA

Radia Indarapatra & Radia Solaiman

So Sharief Radia Indarapatra na wata o Sultan Nabi sa Komara Mantapoli. Na diaken ikadosa a ka phanothola ko mianeg aken a thotolanon ka aya pianga bibinesan non na giyai.

Sii ko masa niyan na aya kon a miphapantagen niyan a mga datu na isaon so Radia Sahimardan, ikadowa so Radia Esmayatin ikatelo so Radia Omayag sa PALAWAN PANTAC, ikapat so Radia Ginara Pandi. Na langowan den a mala a pakaradiyaan sa ingeda ZENON na pembataloon siranon na maoona den so totholan ko Radia Indarapatra ko diron den phakatibabang a pat katao aya a mga datu sabap peden ko
kapaka aasa iyansa kasangkapan niyan a palaya den pakamemesa.

Orian niyan na miya pamikir o Radia Indarapatra a zong sangkai a sebangan a alongan, ka sangkoto a masa niyan na sii matatago sa MANTAPOLI a inged di ama iyan a so Sultan Nabi Bakaraman a adil sa KOMARA MANTAPOLI, Na aya den a ngaran a sebangan nai a alongan na POLO DIAWA, Na miyapamikirian a sii zong sangkai a POLO DIAWA, na miodas ki ama iyan na aya bo a ini iyog i ama iyan na asara pakaonoten niyan so pagari niyan a so Radia Solaiman ka aya piangalian ni ama iran na kagiya langowan na mala a pakalek-lek na sii matatago sa sebangan nai a alongan a POLO DIAWA, na oba ana khasilang kiran a dowa katao na makambalingan sa MANTAPOLI so isa kiran na an makapanonotholan sa miya ola-ola iran, na miniyog so Radia Indarapatra sa makaonot so Radia Solaiman

Na tinimo den no omani isa kiran so kasangkapan niran sa kamamai ka melalakao siran den, na miodas siran den ki ama iran a dowa katao kangganat siran den sa MANTAPOLI, na so kiya pakatepad diran ko lama i ama iran na kominowa so Radia Idarapatra sa sapoon a kilala naso mambo so Radia Solaiman na kominowa mambo sa kilala a sapoon, na tominindeg siran ko kilid o lamay ama iran na ini sekhad iran den a dowa oto poon a kilala taros a pitharo o Radia Indarapatra a "ama ami na phagilayang ka a dowa poon nai a kilala na saden sa malayon non na aya rekami miatay a dowa katao, katatan so rekon no
Radia Solaiman na katii mambo so rekaken non. Totoos singka badn so rekon o omani isa rekami a magari kang ganat kami den." Na lomialakao siran den a dowa katao na piamantek kiran den angkai a POLO DIAWA.

Na kagiya mathi a ka pelalakao iran a magari na miya oma iran a sadorog a lalan na kideg iran den orian niyan na pitharo o Radia Indarapatra a "pagari ko na lelengang kaden sa kapiyang ka a mama ka madakela pakalek-lek sa polo wai a kiya tagoan reketa" na mioway so Radia Solaiman sa tigian "a oway den na seka mambo."

Na orian niyan na miya oma iran den so zangaiyan o dowa lalan na pitharo o Radia Indarapatra a "sii ka okit sa sadorogon nanan a tampar sa diwang ka sii ako mokit sa tampar ron nai sa kawanan", na di magiyog so Radia Solaiman ka aya kabaya iyan na di siran makabelag a dowa katao. Na kagiya diden khiyog so Radia Solaiman na
pitharo o Radia Indarapatra a "sangkaden okit sa tampar ron anan sa diwang ka bangkadi katawi a di taman melonson sa ina." na so kiya nega roo o Radia Solaiman na miarata a ginawa niyan a di alang-alang na sominilay ko diwang o lalan sa ondog nago rata a ginawa niyan ki pagari niyan sa kiya nega niyanon sa di siran melonson sa ina, na
mimbelag siran den a magari.

Na pelalakao siran den sa daa kagagawii na daa kadadaon-dao na di siran den dii phante-pantek sa kalasan na so Radia Indarapatra na langowan den a pekaoma niyan a pakalek-lek na pembonoon niyan den, na lagid mambo i pagari niyan ka sabap ko kapaka oondogian na melagidon o matay ago so di sa kiya lipatan niyan den so inged a kiya phoonan niran.

Na orian niyan na miya ona misampay so Radia Solaiman sangkai a RANAO na di niyan dii pagiliden. Na di niyan den katawan si
pagari niyan nago linipatan niyan den so inged iran a giya MANTAPOLI. Na romiamig den a pikirian sa opama aden a miya oma niyan sii a mga tao na sii den 'mbaling ka mapiya a phagingdan sabap sangkai a ranao ron. Miya tangked den sa akal o Radia Solaiman a ino bes sai di ka phagingdi ka mga pakalek-lek a maginged don ka giangkaya a bebethowan sa pialot sa palao a gorai na di khasongowan ka ron babaling so mala a pakalek-lek a si KAKOWAKA.

Na giangkaya a palao a miakarang na ron mambo babaling so tarabosao a si Makaogis, na giangkaya a kilid a ranao na ron dii paginged si Omakaan a mala a iprit. Gianan ni daon kapagingdi. Na so Radia Solaiman na di niyan den dii pamamagiliden angkaya a ranao na so kini sampay niyan sangkaya a pembethowan sa KALOKAN, na miya oma niyanon si Omakaan na mithidawa siran ka ken ni Omakaan. Na miato so Radia Solaiman na ininggolalan niyan so kawarao niyan na aya da niyanon kapakaato na oman niyan lakhoten na phagotasen niyan na baden pephakadakel. Piotolian sa look so Omakaan na miya dowa katao, na gioto wi daon kapakaato o Radia Solaiman na taman ko sising ngiyan na kagiya a mageda iyan den a khapatay o Omakaan na piokasian sa lima niyan na ini lebadian sa kilid a ranao.Na sabap roo na gioto den ni kiya patay niyan.

Na diden katawan o Radia Indarapatra si pagari niyan o antonaa den ni miya sowa iyan, na sii den mini sampay sa palao a piagayongan. Na kiya bantayan niyan den angkai a ranao na miya tangked den sa akalian a o mini sampay sii so pagari niyan a Radia Solaiman na sii niyan den khatoon sangkai a ranao ka di sii mawa ka mapiya a phagingdan. Domikha den so Radia Indarapatra na rominda ko kayo a mala a maka oobay ron na siarop a torog na miokit sa taginepen niyan a miatay sii sangkai a katotolongan niyan a ranao so ari niyan a so Radia Solaiman na miaka nao den na mini awida akalian taros a miarata den a ginawa niyan sabap ko miathi a da niyan ka ilaya ko pagari niyan.

Na somiong den sangkai a ranao na so kini sampay niyanon na di niyan dii pagiliden. Na kagiya so Radia Indarapatra na aden a ibebegay ron no Allah a moodizatian na so kini sampay niyan sangkaya a darpa a piatayan i pagari niyan na izan obaon pitharo a "sii den miya wapat si pagaringka," na ininggolan niyan den so mala hikmatian na somiong sangkaya a mala a nonok a obay niyan a tanto wa mala a kayo. Na miya tagon den na kinowa niyan a dowa timan a wator a mga tatalanged na piaka pagobay niyan den na ini datolian non so koden niyan ka aya paninti a akalian na thinda kon na ini bala iyanon so isa ko lebian, na mimbaloy a lagid o kambawangen a miya telo timan son datolan niyan na biniyagan niyan den sa apoy, na ini datolian non so koden iyan na so kiya yawi ron na miya gamitian non a lebian na miya talekeb so koden niyan na miya odod.

Na miyaka khala so salindagao a mababaling sa nonok oto na taros a miaka tharo sa tigian a "masablao ka a datu ka ino ka di khowa sa ator a ibalaa kaon ka ayang kaon ipembala a leb ka na pekha odod a ipetindaa kanan," na gomianat so Radia Indarapatra na tigian a "katawang ko wanan na ini tokaw aken noba aden a mababaling sii na kagiya da ka raken makapagma na phataan naken a walaingka ini."

Na pitharo o salindagao sa nonok koto a "asara a dingka pataan na panotholen naken reka so pagaringka a Radia Solaiman, a sii miya patay o mala a pakalek-lek a so Omakaan sangkai a obaingka a darpa. Na aya daon kapakaato o Radia Solaiman na oman niyan lakhoten na na phagotasen niyan na pephakadakel na daon makaato. Na ini lebadian so sising ngiyan sa ranao na miya patay o Omakaan na taros a kiyan niampen so Radia Solaiman." Na pitharo o Radia Indarapatra a "antonaa ika pephaka oma sii o Omakaan." Na tigo salindagao sa nonok koto a "kenabo aba mathi na makaoma sii, sa nayawang ka sii den ka san pephakapoon sa kababaan nanan a palao a giya gorain, na iiketiarka ka katii a peshong sii den, na oba kano maka pethidawa na obang ka otasa."

Na dominingil so Radia Indarapatra na miya ilay niyan a sii makatitindeg sangkaya inged imanto a pembethowan sa kialdan a tomitindegon so Omakaan a pelangga a ngari iyan sa apoy a tanto wa mala a pakalek-lek, ka iprit, iganti a basaon imanto na piantekian den a toka aya a timbangalan a katatagoan ko Radia Indarapatra. Na miaka pagilaya siran den na tigo Omakaan a "miaka kan ta peman ka pedai o miya ona ko wa kiyan." So kiya sipataon o Radia Indarapatra sa
tharomamisen den ni Omakaan na mindod sekanian na inilotian so kolili o pedang ngiyan, na domiasel ko dalema a wato na so lakao niyanon na taman den imanto na mitatandaon ka madakel den a phoon sa mawatan a inged a miya ilay niyan.

Na tiangkirian no Radia Indarapatra so mala a wator a lakongan a kabethowaon a lagid sa kala o matalanged a walay ka di khakawa a mala a mama so patagan no ator a liyakhot o Radia Indarapatra a gianan ni pelawiin o mga nasion sa donya a ka phagilaya iranon sa taman den sa imanto, ka langowan a miaka song sa TOCA A TIMBANGALAN na tanan den miaka paratiyaya sa mataan den a benar, ka da a matoon a makina sa donya aba niyan naya maopak a lakongan naya sa daden a kiya bibayan non a maito bo.

Ka aya ibaratian na so satiman a mala a pega a liakhot a pedang a miaka tana so pedang ko lopa na miakam belag na da maothang oman ni sabalaon a sobo so kilidian a maito i mibebetad ko lopa. Na piaka memesa den naya telo a pakamemesa a daa miakang gola-olaon, Isaon so pembawangenan o Radia Indarapatra, ikadowa so lakao o palad da ai niyan ko lempid da wator, ikatelo so lakongan a inopakian.

Na palayaden imanto phipiya-piyaan, tatanosen o mga lolotio sa KALOKAN ago sa TIMBANGALAN ka sii yaya matatago sa pageletan a dowa aya a inged a kena aba maka khawatana ka mga telo baden ka istarias a khawatanaan niran. Giangkanan a telo a piaka memesa a rarad sii o Radia Indarapatra na makapago obay-obay ka makashosol-soleda anan ko da ma isa ka istariya a lopa sii sa pagletan a KALOKAN ago giya TIMBANGALAN.

Nan dodanta a kiya thidawa iran ki Omakaan, na kagiya tharomamisen den ni Omakaan na ini koyambetian so goligai pandi iyan na miaka timbang sa kaporo ki Omakaan na taros a siyayakhotian den a pedang si Omakaan. Na so kiya lakhota niyanon na kiya palian den si Omakaan na pitharo iyan a "di ka bes matao makithidawa kena a baka mawarao a mama, so Radia Solaiman ni mawarao ka oman nako niyan lakhoten na phagotasen nako niyan, na seka na di. Na o benar a mawarao ka na otasa akong kaden." Na pitharo o Radia Indarapatra a "giyaya den ni ka pakithidawa aken," na orian niyan na miya othang so Omakaan na kagiya makaiga na mapepeko na giangkanan a mala a bobongan a khokoliling sa KALOKAN na inoldan na kapet, gianan so badan no Omakaan a babangonan nanan sa andang a Capitol na taman imanto na aden a penggemao ron a mala a mama a pakalek-lek igira a gagawii, aya kala iyan na so isa ko ai niyan na sii sa Capitol na so sabalaon na sii sa padian naya a MARAWI. Na giyaya nanggibo-gibo a miaka ilay saya.

Orianian na piloloba den o Radia Indarapatra so sising o Radia Solaiman, na kagiya gonanao ron o salindagao sa nonok koto na "sii ini lebado Radia Solaiman so sising ngiyan sa kilid doto a ranao sa tampar sa sebangan a TIMBANGALAN," na inakoyo o Radia Indarapatra sonig sa kalopaan na mini saplid so soso sa pageletan a shogod ago giya boganga na miya baton so soso sa kalopaan, na aya katatambakan non na odi ako peribata o Allah na mga dowa renet odi na kalawanan so lindo niyan, na mga sarenet so baba iyan odi ako lipata o Allah sa kalawanampen noto ka mga kawali yami a tambakan non nanan.

Aya pakamemesaon na iphoon ko dapen so Ispanyol na boliten den. A sekami a maginged na tanan imanto na so kadakel iyan den na aya niyan den kadakel a gioto na phagembaalan a apog, na ipoon sa RANAO go sa MAGUINDANAO sa SULU, nago so mga ped a inged a aden a mga tao ron a dimbabama na da iranden malengan sa taman imanto.

Kowaan non a mga magatos ka sako a boganga na aya pekhakalotan non na mga lima repa a zoke-soker na mga dowa repa a kadalemian. Na mapita na ilayang kabo ka mapepeno peman a boganga a soso ada a odian, pirowang ka ka miya gapog-apog. Sa daon makailay na da pamemesa iphangerabas ami pen ko mga bario road na mga wipon a trak a diron dii peroranan na mabasa alongan nami a pantar na mapita na mitatambak sa da abaon miya lebat na giyaya na benar den.

Na kagiya dabo matoon o Radia Indarapatra so sising i pagari niyan a so Radia Solaiman na gianatan niyan den na imanto den a masa na igira delem a tena-tenao a gawii a paganay a kagagawii na lalangkao ka sa ranao sa laod doto a sugod ago giya boganga ka bangka di mailay a pekikorot sa poro a lagid sa kala o matalanged a bola a mariga a izan no waga, na aya pekhabayawan non sa kaporoan na mga lima anda oto repa na maolog bo na kaoto peman, na madakel a kenabo aba makasasapolo mikorot sa kaporoan. Na gioto so sising o Radia Solaiman, na imanto den a masa na daden nanan mada.

Gianan ni mga rarayag a karina sa mataan den a benar a miya 'nggola-ola ini na so di phakaparatiyaya na pangingiza na odi khabnari na song sa KALOCAN go sa TIMBANGALAN na dayon sa BOGANGA gos sa sogud ka aden ka bena-benari. Sa mataan den a thotolai a mikakarina sa so Radia Solaiman na sii miatay sa TIMBANGALA. Na giya KALOKAN na ino ron mini beto wa KALOKAN ka ron miya lokan so Omakaan.

Na so mga toos sa benar den a miaka song sa inged a ranao so Radia Indarapatra na benar den ka aden a mga rarayag a mga tanda iran. Mitotooson sa benar na thangkaan naken saya pasin so thothol sa phangningko ko Allah a malai gagao a di kowai ikadosa ka giyai so totholan non a bako den pinikisorat ka aden di pekhalipati o khilapis a pagtao. The End!