Ontay & Marogong.Net - MANGA PANANAROON

PANANAROON E DATU ONTAY

Na taginupun e ONTAY a mimbinuntay si sirig ko dalinding o subangan na miparti so linang ko sarigid o phangampong na miamagayao-ayao nago marunding a kilat na boluntai mipugalud sa palao a paramata a bumbaran o alongan na daontawar ko laod ka si-ibo miaribon sa pakabantay a inged na inilabas a orog a boklod sa kalinan na miasayana so tao ka miagomarug so rido na di khalinding a tamok, na inirampana sa dar a ginawako diragun.

Na tiolongan sa sorat o manga bantog a tuan na inilai sa taaber o langon o paririmar na piagayonan niran a siikon ipagiza ko marata e kandatu a daniandun lindinga so p’phagingudanian

Na banda masayana a kairatan sa sogod a laboan sa iranun ka sabapan ki dibuton a panumbilao e dalao na oba sanai o tao e kagia ka marandang a kapuphagingudian ka amaibo ko matangkal ko linog nago masogat a barat a masiringan a gobat, ka andaon ari inged e katamanan sa ngaran odi masayana so datu-on di kapagingudan sa rinao.

MANGA PANANAROON KO BASA MERANAO

A) Na rido a riwadaan so kaiisa o bansa ka o mada ko phangampong na mangontawar so keneg ko randangan mipapantao na khada so pamorawag a phangoranda a pangorandig ko ranao na odi kapagimani na kanogon no marandang ka khada so kabsaran ka magonot a lomimbay sa ka petharos o ig na odi manggola-ola na makaganti a lenga.

na oba pakalipati so taritib ago sempad ka ayaden kasabapan a iphamagayao-ayao sa karodan sa MIndanao na perigayan so palao sa daa datem ko laod na ipelabas so orog so miakam bala-bala na omigadong so sempad na kanogon no phangampong ago so pephangampongon

b) so alongan khaotho na pakasasagaden den ka minsangko di baogen e moraon sa sanggibo na minsan di balbegen i mombos sa makadorat na langganang ko wa omor na dagangkowa kapatay odi ko mitindos rabao so datumanuong ko inged

C) INO SO INIMAN KO A KANDAK A DA MIRAIR INO O BORODI KO DIMBAROPA MAGALIN SO ILMO PUTHATAPUN, KA PRODIAMANAN KO I KAMBOAT O RINARIK KO ANA MALINTAD A IG KA APIYA PITO PANGKAT I PALAO MIYAKA PHAPANGKATA NA TANAN KO TAKUNUGUN KA SAKI ON SO ANGKA AGO SO PAPATA ALAM.................SALAMAT........

D) osa imatowaya na pendirondan si sangkad ko sagayadan o linang koris phamaningad sa madait a denggawan, pelabi so bolawan ko bibir o somagayan ka koris phamanongad sa dait andarayaan

E) Madiang so bolawan a komelas sa kolilingan, Mikadakel sa ranao so bokalag ah montiya na ditaon bobokelen na rorombikiten taon paratiyaya so tao sa odi makambalawag so datomanong ko inged a andang a kabesaran na petalo talo maog so alongan pelangkap na mada so rangka niyan na pantar so pata alam.

F) Tabia ko phangampong a tanan dadalomabi, ka inirending sa mayag i asal a kambangsa ka dimaka pagondakan ka mikadiang ko ragat so bitoon a di saleg na mimbeken so montiya a dabo a sigay niyan na rido di riwadaan ka mampen so datomatong a igagadong sa ranao na tanaw miyakapikir kiyapanalaniran ko mamoti a lopaon ka apiya kon miyalab na asar ko paninindeg ko agama a islam

G) Maregun a limbanan so kapeng-giginawai na rido a riwadaan so asal a kambangsa ka osa imanto aya na tanan so samporna na langon makappipikir sa kapanompang o bantog a ingud tano a ranaw na baakodun pekhala sa daa beton ko a tao sa ayaden mikalilid so giikapagoradoradi ko tirikan a di tiboron a kuwarta ipekandak.........na mikalilid ko tangkal so ayonan a misangkad a dabo a rarad iyan.....na kenabus oba titho i kapananamar iyan ko kapamorawag sigai o alongan pulangkap sa ingud tano a ranaw......

H) Kumbo lombay so kayo na pimbarasipatangko o totoo so kanggaring o tanto so kaphagingud na pisinosino akun o bataon makarunda ka maribrang so sapak a pagonga sa montiya na kagiya masino ko a muna niyan salamun so papanok sa kadaraan pangadir a iliyanan manila na mimbarikawan ako a tao a madarainon ka tanto a makarondan so asalan na Bantogan a ginawako Topaan Ka bamambo di karina a Mikagadong so ranaw na mabinaning so palao ka sabapan sa ladiyan a kayo a dibo gindolongan ka pumbobokun a Kayu......

I) ) Pupulayog sa papas ka pumagapas apasKa tulakin kon ko banog Na diron pukatalakin Ka daon kasakriti.Kanogon si kanogon nakanogon ni ladan ko A pukarasai mamikir a ana palandong a dar Na di akun maphakangud a bologang ko sa gagao Ka Oman akun ipantao na pusulakanan a ig O matao kondalia.

J) Inao manga lombay na pananadem iniyo so awal o zaman so tao.Ka andao mapangingiroy so iman ta ko
tademan ka marega thotolanon. Sa odi kano panamar a langowa kalombayan sa kipananggolonio ko Agama miyatindos. Na baniyoden tanodi ka siiden pekipasod a kapakamboko tano sa okit a kaotantang sa ingedaya Donya na roromampay sa Akhirat

K) Aya man a kandato na ibarat o kakhapal. A polayagan so akal na kalakalat so geda. Na panalongon so gagao na olinan so kawarao. Na pagabakan so gani na tardason so Iman. Tiyotopano pirak so kaiisa o bansa. Na likban o pelata so mona kangginawai. Na o tanto ka Muslim na obakaki mabimban ko rambayong a di kakal ka dika ombo ketanto. Na obaka ki mabiray ko gadong a di lalayon. Ka dibo tanto kelanggay na maga-an bo komelas.

L) O sa imanto aya na sarombakat so bagul a dii makasonsanga ko kalodan o sulangan Na odi porongi mantang a kisang-golay no lagi, na petimbangaros so ig, na pengenepan so ragat. Na mataros a mabolos so panginam ko Donya na ayaden kesabapan sa katarantana maog o pamoreg o bangsa. Na mapatola mabengkas so kapeng-giginawai, na kanogono marandang a goso pephagingdon ka aya khatamananonna sa diron makakendan na maka pendinganoman ko oriyano kasendit.

M) Liwankha iranon a miyathaya rindengan. Na langas ka phangampong a lalayon babaratan. Ka sansara imangkoron odi sinang sa maga-an. Ka khareneb a kalasan na di khapangintagonan. Na phelebog a kalodan na di khapanginseda-an. Ka apiya so lethingan na di Khapamayan degan. Na so langowana katasan na di khaparo embasokan. Kanogono marandang a goso pepha gingedon. Ka benari kamanisan na di kapeshonoran. Ka enggao pagingedan na mayao embango mbangan. Iranon pipharasan a ranao piphandara-an. Na dika baden gagaben ka endarakempeng ka iran. A ikmat a limpangan a lalaga lalagedan. Ibarat a satoran a siyorongan sa tundan. Na so langowa langka-an na tanan kiya tong-goan. Ka apiya so tarosan na di khaparo lokisan. Ka kagaganda walian sa dikhapos a lawa-an. Na embalingan sa ranao so kapeng giginawa-i. Na mampir sa pagilidan so kanayo o bansa. Na mantanowa sebangan a alongan simaoray. Na mashandongan o dan so panonotonga riyawat

N) Ingekho a Mindanao a darepa o manga tao. Malaon so Agama ago so tindeg ko inged. Tiyaritib a kompas o mona mimbilangatao. Inator a hokoman o andang a madirisen. So manga palaongka a go so balintad ka. Di khatimbang a tamok a da ayatiyan taman. So sagezengo angin a go so ranti o senang. Di khangen a alaga a da a bilanganiyan. Igira pikirengko a diko kapezonoran. Sansara so taoron na rantang so pephagined. Miyadaon so ranon go so gagao sa lolot. Sominep so kapdi go so kakhalimoay. Amay ko manayaden i mapepheromba tano. Kanogon o bangonan na doaniyan so inged. Sa den sa takediron o diroyoza bangesa. Manaros a mamantek a daa sangeka aniyan. Tanan tano mamikir a kambalingano masa. Matata ayon tano ka dodon so menang tano.

O) Di khatimbango gaus so kapenedo kaongo. Na di khangeno kadato so kala-i kasanggila. Makasayana ini a lomiyangkap ko inged. So wasiat ago pando na baden phananggaolo. So si-ig na goso dengki ka mapay o minilonto. Na baden kialabawi a diniyan kakhaonser na. Inao manga lombay na sombay mayontano ko. kapephagayonayon ka paramaniso inged a goso Pephagingdon a katataayoniran

P) Inowa miyanekho a ana kapal sa ragat a meligoy sa mangkasar na dapamanay sa siyap Na phandi sa tordo ka lomiyayag a kopor na kagiya phaka tokaw na si-ibo mini pimpir Sa boklod sa sendita na miya pamikiriyan a langona tao a kopor a di romandonga sango Ko kadenana da phayag na lomalan sa marasay na mokit sa masansara Na giyanana thomanan sa okha akol akembo na thomoden so kasango ka kalokalo dindorat Sa balimo so kadenan sa ogopan so phanamar ka andi tanto karasay

Q) Miyakapiya Ranao ka siyamborakaniran sa bolawan ago pirak. Na ingatan pagingatan ka sadi matao mbiday ko sarigido mabandes. Na mitaloga ko karang, na mibolog sa aolan. Na omaketeng a irat a matampay so bakorod a pitharotosan o ig. Na aya karegenian na odi kathiyakapi na liwaleg a misambi. Ka sadi kakaningkiran sa ranon ago so gagao na kiyagalang-galangan sa oragis ago dapat.

R) Ibtad so mantri ko patarogo papanan na zamata di zamata na magironota tadn sa olayan sa rambayong. tanodinka marugun ka myatharo ko mambo a soba ka sa raya na somagansang akoron na o ladas ka sa lilod na pundorosa ko mambo na o kadnka sa titib na mampira ko sa kilid. na o pagalangalanka na magintara ako, na o panik ka sa lamin na somongako sa gibon. na sodn so ranonakn i ipuphangadapakun sa romba a ladan ka.

S) Ibubutad so tabak a tabaka tabakintan na dii sayasabun o Papanok a Sampiri na omaniyan sayabun na dirombo pakatana ka karorowan sa papak na kadaan sa tomapus na kabaling a toka iyan, taksil sa pulayag ko binaning a ragaton a gadong a layagunon ka zarisidun ka undo na panarintikan kaon ka badi katawi o tao a ilian pagadatan so ingud sa madalundug...

T) Osaimanto aya na mikadakul sa ranao so bukalag a montiya na mindakul so bolawan a malogao a binaning na ditaon bobokulun na rorombikitun taon, paratiyaya so tao sa odi makambalawag so datumanong ko ingud a andang a kabusaran amuna a igagadong na apiyapun mapuno o bokalag a montiya a ingud tano a ranao na pantar so pat a alam,

U) Saribolan imanto a inggumao i bantogun na aya niyan kakhada a kaputomangkud iyan ka muliyawao ko gabon ka kagiya pipirakun, ka bowaya gomagamba na dikabadun gagamba ko pamakolodan o ig ka rangirisun ka undo na dansalan ka a bagul na bakadun maka galud sa daa bantoganuka....

V) Gowani ko baden tig so khitalingoma masa ko mosim a songgoda ig na antara so madakel nagom bales so maana na kiya tokawan no tao a ana phandiamongen a isa bo sa pompongan na di ta ipangangandam sa badi ondas ko rinao ka domaramba si mirag na mapiya makasonsang sa bagyo a marodo na diden baroba maog ka miya patri sileg o lalao a di mada na o khatig si Maranday na minsan makasagansang sa latasan a bagyo na di perin pekhoyakas ka pekhakembang sa lindao o tolos a da marendan na daraan sidan tano a kapelabo o masa ko kapembetadan niyan ka sii tano phakandod ko lalag o tohan tano ka pandoan niyan nai.

W) So andao ko sebangan na romianti ko laod na miya gilang gomilang ko miakam bala-bala na soden so kini sendigo pamorawa-ginendao ko bokelod tomiyanong na da ontawar so keneg a ipera-parap ko ig ka kagiya si Baningen a miaka rao gadongan ko alaga sa minombao na so kiya tanto niyan sa miangen so kaparansa tagolambeg o bagel na miya among so sigay ko atag o rangka sinang ka kagiya so tihaya a kipantao sa othowan ka toos ko masalindao a miangolam-binaning ka kagiya miya tanto a khaaben no alongan so datomanong ko inged

x) Ana mombao a masa a maada sa ginawa ka kagiya sialegan no borawan datomanong so matatangked a khirek na odi kapagimani na kha arogan sa khada na awida pamikiran ka makapengigibasa so isa bo sa pompongan ka benar a siray so ig na isa sa ontawaran. Na kanogon a kakhaog o asal a ini gambar a pagawan tano mona na aya lebi ko andang sa diron kapelipati na mamalampak ki bekao na amay ka zambiin non so talibon a pekhalas a magaan ko moyakas na khapanon so alaga a phagarapen dingilan ka ana basa meranao a so sagorompong a bok na o makam babi-babid na masarig a inggakot ko makapembelabelag na so tarintik a oran na igira a lagid a dimalapang a kaphagontawarian a mapangangandam mo tao na aya kapiya niyan na impiten so pithaong na kowaan non so daway ka andi khapaawingi ka maaden so lemba mago golimbo a daon na andai ka adilon o mga rokon o lemba na miya kowa so sinta a piya landong a amal na so limo a mapiya na sii anan pagendod ko phoonan no pandoan ka aya makalimoon a pagendodan no masa.